Egilea: Jeff Kinney

Itzulpena: Antton Olano

Deskribapena:

Beti iruditu izan zaigu aipagarria sail honek duen arrakasta eta irakurle gazteekin duen amodiozko istorio amaigabea. Gure gizarte hiperteknologiko honetan, gailu eta tramankulu elektronikoek gure izaeraren azken zirrikituak gailendu dituzten garai hauetan, hara non agertzen den pertsonaia malapartatu eta lotsagabe bat, gaztetxoen bihotzak bereganatu dituena bere izaera xume eta lagunkoiarekin.

Eta arrakasta horren gako nabarmenetariko bat, umorearen eta ironiaren erabilera zuhurraz gain, errealitatearekin duen erlazio zuzenean kokatuko nuke.Azken liburu honetan, lehen aipaturiko teknologiaren inguruko hausnarketa egiten du egileak: Gregen amak esaten omen dio bideo-jokoek eta telebistak bigundu egiten dutela Gregen garuna, eta telebista eta kontsola itzaltzen baditu agian egunen batean aurkituko duela dohainen bat hor zegoenik ere ez zekiena. Ildo horretatik, ideia zoragarri bat bururatzen zaio: Halloween eguna gertu dagoelarik beldurrezko pelikula bat egitea, gozokiz beteriko poltsa xelebre bat lagungarri duela. Handik aurrera, pasadizo xelebreenak eta txundigarrienak biziko ditu gure lagun kutunak, munduko zinegilerik arrakastatsuena eta aberatsena bilakatzeko nahian. Inoiz ezin baitugu ahaztu ez dagoela ezer zirraragarriagorik eta dibertigarriagorik gure irudimena lantzea baino, eta, lagunen artean bada, are hobeto.