Egileak: Euskal Barrokensemble

Deskribapena:

Antzinako euskal musika disko mamitsua argitaratu du Euskal Barrokensemble taldeak. Hainbat urtez Jordi Savallekin jotako Enrike Solinis gitarra jotzailea da taldearen zuzendaria, eta eskarmentu eta dohain handiko musikari talde zabalarekin euskal konpositore klasikoen eta euskal tradizioko doinuak grabatu ditu, tartean hainbat dantza doinu ere. Zuzendaritza, gitarra, laud eta beste hainbat tresna jo dituen Enrike Solinisekin batera, Miren Zeberio biolinarekin, Leire Berasaluze, Maika Etxekopar ahotsarekin, Mixel Etxekopar txirula eta ttun-ttunarekin, Sabin Bikandi txistu eta albokarekin, edo Rami Alqhai gambako biolarekin aritu dira besteak beste diskoaren grabaketan. Euskel Antiqua lanak, Enrike Solinisen zuzendaritzapean “euskal arteak oinordekotzan utzi digun musika” jasotzen du 23 abestitan, iragan garaietako musika eta literatura gaurko egunera ekarriz.