Egilea: Asier Amezaga Etxebarria

Deskribapena:

2021eko Hizkuntzalari Euskaldunen V. Topaketa hura antolatzea otu zitzaigunean, helburu argia genuen: azken urteetan gaur egungo euskararen ikerketari ekin zioten ikertzaile gazte horiei plaza eskaintzea. Horietako zenbait euren ikerketaren lehen emaitzak kanpoan aurkezten hasiak ziren gainera, eta Euskal Herrian bertan aurkezteko bidea eman nahi genien, beste alorretako jendea ere ezagutu, iritziak partekatu, harremanak estutu eta, finean, euskal hizkuntzalarien komunitatea saretzea xede.

Argitalpen honekin lan horretan sakontzea da gure asmoa, hots, Euskal Hizkuntzalaritzako kimu berriei ahotsa eman, haien ikerketa Euskal Hizkuntzalarion artean zabaldu eta eztabaidagune bat elikatzea. Sei ekarpen biltzen ditu liburu honek, euskal hizkuntzalaritzaren hainbat arlo gaitzat hartzen dituztenak: fonologia, bariazionismoa, itzulpengintza, psikolinguistika eta sintaxia, hain zuzen.