Egilea: Chimamanda Ngozi Adichie

Deskribapena:

Chimamanda Ngozi Adichie idazle nigeriarraren Guztiok izan beharko genuke feminista saiakera euskaraz argitaratu du Hik Hasik. Lana Euskal Herriko ikastetxe denetara zabalduko dute. Ngozi Adichie idazle nigeriarrak badaki feminista hitzak konnotazio negatiboak dituela, eta era berean oso argi du guztiok izan beharko genukeela feminista, emakumeen eta gizonen arteko eskubide berdintasuna jokoan dagoelako. Saiakera labur honetan, feminista zergatik izan beharko genukeen argudioak ematen ditu. Horretarako adibide asko jartzen ditu, hasi bera haurra zenekoak eta gaur egun berari eta bere inguruko emakumeei gertatzen zaizkienak. Esate baterako, umetan ikasgelako notarik onena aterako zuenak ikasgelako begiralea izateko aukera izango zuen.

Ngozik atera zuen notarik onena, baina irakasleak esan zion begiraleak mutila behar zuela izan, ez neska. Gaur egun bestelakoak gertatzen zaizkio, adibidez, Nigeriako jatetxeetan gizonekin sartzen den bakoitzean zerbitzariak gizona agurtzen du eta, emakumea ez. Adibidez adibide Nigerian emakumea izatea zer den azaltzen doa, nola bizi duten egunero, xehetasun txikienetan ere, diskriminazioa.

Europako ikuspegitik begiratuta, hainbat egoera eta gertaera gainditutzat dauzkagula irudituko zaigu, baina zoritxarrez beste hainbat adibide oso ezagunak egingo zaizkigu. Ngozi idazleak entzuteko idatzi zuen orain saiakera den lan hau eta ingelesez eskaini zuen TED talk deitzen diren saio horietako batean. Idatzizko jatorrizko lanaren izenburua We should all be feminists da. Suedian 16 urteko ikasle guztiek saiakera honen ale bat dute. Euskarazko lana Hik Hasi egitasmo pedagogikoak argitaratu du, Plazara Goaz euskara elkarteak sustatu du itzulpena eta AEK-k itzuli du. Lorea Agirreren hitzaurrea dauka. Hik Hasiren helburua Euskal Herriko ikastetxe guztietara zabaltzea da. Bestalde, edozeinen eskura dago sarean doan.

Argia astekaria